టమోటా ధర.. పతనం..!
1 min read
– దిక్కుతోచని స్థితిలో రైతులు… అప్పులపాలవుతున్న వైనం
– కలగానే.. టమోటా జ్యూస్ ఫ్యాక్టరీ ?
పల్లెవెలుగు వెబ్, పత్తికొండ: కర్నూలు జిల్లా పత్తికొండలో రైతులు సాగు చేసే ప్రధాన పంట టమోటా. దశాబ్ధాల తరబడి ఇక్కడ టమోటా జ్యూస్ ఫ్యాక్టరీ ఏర్పాటు చేయాలని ప్రజా, రైతు సంఘాలు ఎన్నో ఆందోళన, ఉద్యమాలు చేసినా ఫలితం లేకపోతోంది. దీంతో ఏడాదికేడాది రైతన్నలు నష్టపోతూనే ఉన్నారు. ఈ ఏడాది కూడా యధావిధిగా చేతికొచ్చిన టమోటా పంటకు గిట్టుబాటు ధర లేకపోవడంతో.. భారీస్థాయిలో సాగు చేసిన పంటను రోడ్లపై పడేయాల్సిన దుస్థితి నెలకొంది.
హామీలు.. నీటిలో బుడగలే..
ఎన్నికల సమయంలో ఓట్ల కోసం రైతులు, కూలీలకు టమోటా జ్యూస్ ఫ్యాక్టరీ ఏర్పాటు చేస్తామని హామీ ఇస్తున్నారు. అధికారం వచ్చిన తరువాత ఫ్యాక్టరీ ఊసే ఎత్తడంలేదు. ఓ వైపు దళారీ వ్యవస్థ రాజ్యమేలుతున్నా… ఎవరూ పట్టించుకోవడంలేదు. రోజు రోజుకు పంట ధర పతనమవుతుండటంతో .. సాగు కోసం చేసిన అప్పుల ఊబిలో రైతులు కూరుకుపోతున్నారు. ఇప్పటికైనా ప్రజా ప్రతినిధులు కళ్ళు తెరిచి ఈ ప్రాంతంలో టమోటా జ్యూస్ ఫ్యాక్టరీ ఏర్పాటుకు కృషి చేయాలని రైతు సంఘాల నాయకులు కోరుతున్నారు.
About Author
